Lubanyinyani hahulu – Kahungu

Mueteleli waKatengo kaBasali mwaSwapo Fransina Kahungu ukupile bayahi banaha Namibia babali mwalilimo zakupepa kuli babe ni bana babañata naize kuhulisa palo yabatu mwanaha ki kwabutokwa mwakuhapa balipisinisi nikubulukela babeleki bakamuso nikuyandulula mayemo asifumu mwanaha Namibia.  

Kahungu naize Namibia iswanela kuekeza palo yateñi pili isikaba kale ni butata bwabayahi banaha linaha zecwale kaJapan, China ni South Korea litalimana ni bona. Nabulezi manzwi ao kanako yakuikambota ni New Era viki ye, mi naize palo yanaha Namibia yelikana bolule babalalu ikona kuzwafisa balipisinisi bababata palo yetuna yabatu.

“Kuli pisinisi ikone kuhula, mutokwa nombolo yetuna yabatu babaleka, Cwale. Kunani tokwahalo yetuna yakuli luzwelepili kuhulisa nombolo yabatu babapila mwanaha Namibia,” nabulezi. Kahungu naize Namibia iswanela kuituta kwalinaha teñi bayahi banaha babase basupezi basunda bayahi banaha bababeleka.

Nafile mamela kuli Namibia ikaswana yatalimana ni butata bobuswana haiba nombolo yabatu babaswanela kubeleka inge ifukuzeha. “Halulati kuli naha Namibia italimane nitaba yeo yakuli mwalilimo zelishumi zetaha, munani feela ni piramidi yebonahala cwalo, kuli kwatasi buñata ki batu babahulile, mi likwata zabatu babaswanela kuitenga mwalitaba zalipisini nombolo yabona yafukuzeha,” nabulezi. 

Kahungu naize tuso yamubuso ikatokwahala haiba Namibia inge ibata mabasi kuli abe ni bana babañata. Nasupile litaba zecwale ka masheleñi akutusa babashebile kuipabalela, lituto zamahala kwalikolo zalituto zepahami, tuso yamakete, mi hape nakupile mubu kuli ukone kucipa kuli batu bakona kuleka. Naize mandu atula niona akona kupaleliswa batu kuba ni mabasi amañata.

Kahungu nabulezi hala likalafo zakuyemisa lupepo. Nakupile kuli sicaba sino fiwa lituto kuamana ni bunde ni bumaswe bwakusebelisa likalafo zakuyemisa lupepo, kakuli kwapili likona kutiseza basali butata mwakuitwala. 

Manzwi ahae ataha Namibia haizwelapili kulwanisa lipiho zakuyumba bana. Kahungu naize zetisa kuyumba bana liswanelwa kulemuhiwa, nikuli basali babaitwezi ni basali babapuluha lwapili baswanela kufumana lituso sihulu basanzo zwafela kwakupuluha. Nabulezi hape kuli mafu akuiponda ni likozi zafamukwakwa nizona lisunda kuli palo yanaha iswanela kuhulu

The post Lubanyinyani hahulu – Kahungu appeared first on New Era.