Eemiliona N$21 okunyumuna okatomeno kaShakati 

OSHAKATI – Ouministeli wounamapya, eeshi, omeva nomatalululo omadu otau ka nyumuna okatomeno kaShakati moshitukulwa shaShana neemiliona N$21. 

Edi oda kolekwa kuNgoloneya woshitukulwa shaShana Hofni Iipinge, koshoongalele osho sha li moshitukulwa shi na sha neyandjo leendjidikila dipe dokulongifa edu moshitukulwa. 

“Ombelewa yomukulunhu woshikondo shounamapya Petrus-Canicius Nangolo oya ti otai ka yandja eemiliona N$21, di longe, okuwapaleka nokunyumuna onhele e i,” Ngoloneya ta holola ngaho.

Iipinge okwa twikila ta ti ngeenge okatomeno oka ka patuluka, otaka ka yandja oilonga kovakalimo va fika po 200 lwaapo.

“Oshitukulwa eshi onda hanga shili mehalakano nedundakano li hapu, sho vali oshi na ashike omatungo pangelo mahapu a ninga omaputu oo otaa hepa ashike,”   Iipinge ta holola. Okwa ti okatemo oko kamwe komeenhele odo da ninga omaputu modoolopa, da ninga eedula da fika kaimba 20 ita ka longo. Ta ti eshi ka pata oka fiya ovakalimo vahapu moluhepo molwaashi oilonga oya kana. Iipinge okwa twikila kutya eshi eya koshipundi, okwa ninga onghendabala yokutalela po,  opo a tle apa ta kwata, okuyambula po odoolopa. 

“Paife eshi hatu popi ngaha, onhele oyo oina ovanhu veli 40, aame mwene ndeva kuta tava wapaleke ko nongeenge ova mane oha ndi vafutu ame mwene mondjato yange,” ta ti.

Okatomeno kaShakati oka li ka pata shaashi ehangano lo Meatco ola li ta li shongolola kombinga yoshimaliwa.

Okatomeno aka oke ya pefimbo ovanafaalama vahapu vali vehe na oimuna ihapu okulandifa nokutoma kokatomeno. 

Natango, vahapu ova li va talelwa po koshikukuta, osho sha li sha dipaa oimuna imwe molwa oukumba. 

Iipinge okwa ti imwe yomoinakuwanifa yaye moshitukuwa tete okunyumuna eenhele di hapu depangelo odo dili moshitukulwa da fya, ashike oda li hadi yandje omakwafo kovanhu nale. 

Omwedi wa dja ko, Ngoloneya okwa nangeka oteendeela yokuwapaleka osekundefikola yaLuno oyo ya ninga efimbo ya pata. Epangelo ola yandja eemiliona N$50, okutungulula osekundefikola yaLuno. 

Iipinge okwa ti natango okwa li yo eli pyakidila nokulonga oombakumbaku va koya po 20, ovo ta ti okwa hanga ashike va  pungulwa itava longo shaashi okwa li va teka.

“Paife mOshana ita mu ka kala vali mu na omhumbwe yomambakumbaku shaashi ava va pangelwa otava kwafa oshiwana moshitukulwa,” Iipinge ta ti. 

-taimihaihambo2000@gmail.com

The post Eemiliona N$21 okunyumuna okatomeno kaShakati  appeared first on New Era.